ABŞ Mərkəzi Hərbi Komandanlığı (SENTKOM) bəyan edib ki, bu ölkənin qüvvələri bazar ertəsi günü səhər İranın hərbi infrastrukturuna hücum həyata keçirib. Hücum İranın ticarət gəmiçiliyinə qarşı təcavüzlərini davam etdirməsinə cavab olaraq icra edilib.
SENTKOM-un bəyanatına görə, ABŞ-ın şənbə günü M/V Ever Lovely gəmisinə İranın hücumuna cavab olaraq əməliyyatlar keçirməsinin ardından İrana atəşkəs razılaşmasına riayət etmək üçün imkan tanınmışdı. Lakin İran qüvvələri bazar ertəsi günü ABŞ şərq vaxtı ilə saat 4:30-da kamikadze pilotsuz uçuş aparatı ilə M/T Kiku neft tankerini hədəfə aldı.
SENTKOM əlavə edib ki, Panama bayrağı altında üzən və 2 milyondan artıq barrel xam neft daşıyan həmin tanker Hörmüz boğazının yaxınlığından keçərkən hücuma məruz qalıb.
Bəyanata əsasən, ABŞ hərbi təyyarələri İranın hərbi nəzarət infrastrukturunu, rabitə sistemlərini, hava müdafiəsi mövqelərini, pilotsuz uçuş aparatı anbarlarını və mina döşəmə imkanlarını hədəfə alıb.
SENTKOM vurğulayıb ki, ticarət gəmilərinin Hörmüz boğazından keçişi davam edir və ABŞ qüvvələri tam döyüş hazırlığı vəziyyətindədir.
