ABŞ müdafiə naziri Pit Hegset bildirib ki, ölkə hökuməti İranla müharibənin davamı üçün Konqresdən icazə almağa ehtiyac görmür, çünki onun sözlərinə görə, davam edən atəşkəs səbəbindən hüquqi müddət “dayandırılıb”.

O, bu açıqlamaları ABŞ Senatının Silahlı Qüvvələr Komitəsində sualları cavablandırarkən səsləndirib.

Bu iclasda demokrat senator Tim Keyn hökumətin İranla müharibəni davam etdirməsi üçün nəzərdə tutulan 60 günlük hüquqi müddətin bitməsi ilə bağlı sual verib və Pit Hegset belə cavab verib: «Hazırda atəşkəsdəyik və bizim qiymətləndirməmizə görə, 60 günlük müddət atəşkəs zamanı dayanır.»

Senator Keyn isə bu fikri rədd edərək bildirib: «60 günlük müddətin başa çatması hökumət üçün həqiqətən mühüm hüquqi sual yaradacaq.»

Müharibə səlahiyyətləri haqqında qanuna əsasən, ABŞ prezidenti hərbi gücdən istifadə ilə bağlı Konqresi 60 gün ərzində məlumatlandırmalıdır və bu müddətdən sonra ya hərbi əməliyyatları dayandırmalı, ya da müharibəni davam etdirmək üçün Konqresdən icazə almalıdır.

Donald Tramp administrasiyasının İranla müharibə ilə bağlı 60 günlük müddəti cümə günü başa çatır.