İsrailin İranın hərbi hədəflərinə hücumlarının davam etdiyi bir vaxtda, rəsmi mənbələr ABŞ-İsrail birgə hava zərbəsində Xameneinin öldürüldüyünü açıqladı. Bu hadisənin bölgədə güc balansını yeni və gərgin mərhələyə keçirə biləcəyi bildirilir.

Araz News-un Reuters-ə istinadən yaydığı məlumata görə, ABŞ və İsrail genişmiqyaslı hava hücumlarında Xameneinin öldürüldüyünü açıqladıqdan saatlar sonra İranın rəsmi mediası da onun ölümünü təsdiqlədi. İsrail bazar günü səhər ballistik raket sistemləri və hava hücumundan müdafiə obyektlərinə qarşı yeni hücum dalğasının başladığını bildirdi. Tehran şəhərində partlayış səslərinin eşidildiyi qeyd olunur.

Buna cavab olaraq İran İsrail və bölgədəki ABŞ bazalarına yüzlərlə raket və PUA atdığını açıqladı. SEPAH ABŞ və İsrail maraqlarına qarşı daha geniş cavab əməliyyatlarının hazırlanmaqda olduğunu bildirib. Tehranın Hörmüz boğazını bağlama xəbərdarlığı isə qlobal neft bazarlarında narahatlığı artırıb.

BMT baş katibi dərhal atəşkəs çağırışı edib, Rusiya və Çin isə nüvə danışıqları davam etdiyi bir vaxtda hücumları tənqid edib. Vaşinqton isə İranın uranın zənginləşdirilməsindən imtina etmədiyini iddia edərək əməliyyatların məqsədinin İranın nüvə silahına çıxışının qarşısını almaq olduğunu bildirib.

Xameneinin öldürülməsi və ABŞ-İsrailin “xalqın ayağa qalxması” çağırışı İran daxilində siyasi və sosial gərginliyi artıra bilər. Bununla yanaşı, ekspertlər ölkədəki təhlükəsizlik və hərbi strukturların hələ də güc alətlərinə sahib olduğunu vurğulayır.