İranın xarici işlər naziri uranın zənginləşdirilməsinin davam etdirilməsini və raket proqramının müzakirə olunmaz olduğunu vurğulayaraq xəbərdarlıq edib ki, ABŞ-ın hər hansı hücumu baş verərsə, bu ölkənin bölgədəki bazaları hədəf alınacaq.

Araz News-un məlumatına görə, Seyid Abbas İraqçı "Əl-Cəzirə" telekanalına müsahibəsində uranın zənginləşdirilməsini İranın "mübahisəsiz haqqı" adlandırıb və bu prosesin davam etməli olduğunu bildirib. O əlavə edib ki, hətta hərbi hücumlar belə İranın nüvə potensialını məhv edə bilməyib.

İraqçı müsahibəsinin digər hissəsində İranın raket proqramının "heç vaxt müzakirə mövzusu olmadığını" qeyd edərək, bunu müdafiə xarakterli və istənilən danışıqların gündəliyindən kənar bir məsələ kimi xarakterizə edib.

İranın xarici işlər naziri hərbi gərginliyə toxunaraq bildirib ki, Vaşinqton İrana hücum edərsə, Tehranın cavabı ABŞ-ın bölgədəki hərbi bazalarına yönələcək. O vurğulayıb ki, İranın qonşu ölkələrə hücum etmək niyyəti yoxdur və bu ölkələrlə orada yerləşən ABŞ bazaları arasında fərq qoyur.