آراز نیوز

ارگان خبری تشکیلات مقاومت ملی آزربایجان

دیرنیش
سه شنبه ۳ام اردیبهشت ۱۳۹۸
آخرین عناوین
شما اینجا هستید: / خبر / دکتر لطیف حسنی دن ۹۸جی ایلین گلیب چاتماسی اوچون گؤزل بیر یازی

آزربایجانلی سیاسی محبوس

دکتر لطیف حسنی دن ۹۸جی ایلین گلیب چاتماسی اوچون گؤزل بیر یازی

آخی، وارلیق بو قدر سویوق و قارانلیق اولمامالیدی. ان آزی یوخولاریندا گوردویو دونیا تام باشقا بیر دونیایدی. یوخولارینداکی دونیا داها ایشیق، داها ایستی و حیاتلا قایناشان گوزل دونیایدی. تورپاقدا بو قدر اوزو سویوق دئیلدی.

دکتر لطیف حسنی دن ۹۸جی ایلین گلیب چاتماسی اوچون گؤزل بیر یازی
۲۸ اسفند ۱۳۹۷ - ۱۱:۵۱
کد خبر: ۵۰۴۱۰
تحریریه آرازنیوز

یاز گلیر شاختانین جانین آلماغا
گئجه- گوندوز آراوئرمه دن ساواشیب جانینی بوروین پولاد کیمی برک، اورک سیخیجی زنداندان قورتاردیقدان سونرا نه قازانمیشدی؟ قارانلیق، قاتی قارانلیق. اوسته لیک بو قارانلیقدان قات- قات آرتیق اونون آمانینی کسن بوم بوز تورپاق؛ اوجو-بوجاغی بللی اولمایان بیر زندان کیمی اونو چولغالامیشدی. هریانا سوسقونلوق و دورغونلوق حوکوم سوروردو.
جانی برک اوشویوردو. دونوب بیر، جیلیز، یوموشاق و اینجه گووده سینه (ساپینا) باخدی؛ بیرده قارشیسندا هریانی بوروین سویوخ تورپاغا.
بونون سونو نه اولاجاقدی؟-دئیه اوز-اوزوندن سوردو.

آخی، وارلیق بو قدر سویوق و قارانلیق اولمامالیدی. ان آزی یوخولاریندا گوردویو دونیا تام باشقا بیر دونیایدی. یوخولارینداکی دونیا داها ایشیق، داها ایستی و حیاتلا قایناشان گوزل دونیایدی. تورپاقدا بو قدر اوزو سویوق دئیلدی.
بونلاری دوشونه- دوشونه درین بیر یوخویا گئتدی. یوخوسوندا اوزونو تورپاغین قوجاغیندا گوردو. تورپاق ایسه داها مهریبان داها ایستی اونو برک-برک جانینا سیخاراق قولاغینا پیچیلدادی: “منه باخ بالاجا! مندن اینجیمه. من تورپاغام؛ سنین آنان. سن اوزونو بو ظلمتدن قورتاریب، آزادلیغا چیخماق اوچون یالنیز منده کوک آتمالیسان. من بو آن میلیاردلارلا سایا-حسابا گلمه ین سنین کیمی لری اوز بطنیمده داشیماقدایام. هامیسی دا سنین کیمی داریخیب، وورنوخورلار. بیرده بو سویوخلوق مندن یوخ؛ شاختاداندیر. شاختا ایسه بوتون بیتکی لرین قاتی دوشمنی دیر. او، گیردیی باغ- باغاتدا سویقیریم توره دیر. من سنی اوز بطنیمده بو دوشمندن قوروماقدایام. بونودا بیلمه لیسن کی، شاختانین جانی قیشا باغلیدی. ایندی ده بو آن، ائشیکده ” یاز”لا “قیش” آراسیندا بویوک بیر ساواش گئدیر. بو ساواشدا قیش یئنیلمه لیدی. قیش یئنیلدیکده ایسه جانیمیزا دولان شاختا ارییب یوخ اولاجاق. بودا سنین آزادلیغین دئمکدی. آنجاق او گونه دک سن داریخمامالی، اومودونو ایتیرمه مه لی بیرده دوزوملو اولماغی باجارمالیسان.”

یوخودن آیلدیقدان سونرا، او یوخونون سئوینج حیسسی هئچ بیر زامان اوندان آیریلمادی. اوسته لیک بو سئوینج دن ایچینده بیر ایسینمه حیسسی ده یارانمیشدی. آرتیق، نه شاختادن چکینیردی نه ده قارانلیقدان. بیر طرفدن تورپاقدا کوک آتاراق، باشقا طرفدن ایسه اوز-گوزونو تورپاغا سورته رک، سئوه- سئوه اوزو ایشیغا دوغرو جوجرله مه یه باشلادی. گئت-گئده تورپاقدا یوموشالماقدایدی.
و نهایت اون- اونبئش گوندن سونراتورپاقدان چیخیب شاختایلا اوز- اوزه، گوز-گوزه، سوز-سوزه گلدیلر. آنا تورپاق دایاغیدیرسا کیمسه یه یئنیلمه یه جیندن آرخاین ایدی. ائله بو آرخاینلیقدان آرتان گوجویله ده شاختایا یئنیب،آزادلیغینی قازاندی.

آزادلیغا چیخدیقدا اونجه اورتویونو باشیندان آتیب؛ گوزل لچکلرینی گونشین قیزیل شعالاریندا سیلکه له دیکدن سونرا، اونون گوزللیی قارشیسیندا یاواش- یاواش گیریله ین شاختایا اوز توتوب دئدی:
شاختالار تورپاغی دوندورسا بئله،
قات-قات بوز اوستونه قوندورسا بئله،
گئجه لر ظلمتین اؤدؤ داغیلسا،
قورخودان باغریلار چات-چات یاریلسا،
یاز گلیر شاختانین جانین آلماغا.

بو گوزل یاز بایرامینی گونو-گوندن سوفره سی کیچیلن و یوخسوللاشان گونئی آزربایجان میللتینه؛ میللتیمیزین یاریسیندان آرتیق میللی آیری سئچکیلیکله یاناشی جنسی آیری سئچکیلییه معروض قالان گونئی آزربایجان قادینلارینا؛ اوتایلی-بوتایلی آزربایجانین قاچقینلارینا، کوچکونلرینه و نهایت جمهوری اسلامی رژیمینین تورمه لرینده دوستاقلانان سویداشلاریمیزا تبریک دئییرم.
گون او گون اولسون بیرلیکده میللی آزادلیق بایرامینا چیخاق.

  • لطیف حسنی
  • اسفند ۱۳۹۷
  • رجائی شهر تورمه سی

هیچ دیدگاهی برای این مطلب ثبت نشده است

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

این سایت از اکیسمت برای کاهش هرزنامه استفاده می کند. بیاموزید که چگونه اطلاعات دیدگاه های شما پردازش می‌شوند.

روی خط خبر