آراز نیوز

ارگان خبری تشکیلات مقاومت ملی آزربایجان

دیرنیش
پنج شنبه ۳۰ام خرداد ۱۳۹۸
آخرین عناوین
شما اینجا هستید: / بیانیه / خورداد قیامی‌نین ۱۲جی ایل‌دؤنومو ایله باغلی گونئی آزربایجان سیاسی قورولوشلارینین اورتاق بیلدیریشی

بیلدیریش:

خورداد قیامی‌نین ۱۲جی ایل‌دؤنومو ایله باغلی گونئی آزربایجان سیاسی قورولوشلارینین اورتاق بیلدیریشی

خورداد قیامی‌نین ۱۲جی ایل‌دؤنومو ایله باغلی گونئی آزربایجان سیاسی قورولوشلارینین اورتاق بیلدیریشی
۳۱ اردیبهشت ۱۳۹۷ - ۲۲:۰۸
کد خبر: ۴۴۲۳۵
تحریریه آرازنیوز

بؤیوک آزربایجان تورک میلتی و دیرلی میللی حرکت منسوبلاری

۱۲ایل بوندان اؤنجه بئله بیر گونده آزربایجان تاریخی تایسیز اهتیشام و عظمتده بیر اولایا شاهید اولموشدور. ۲۲ مای ۲۰۰۶ (بیر خورداد ۱۳۸۵) آزربایجان تورک میلتی گونئی آزربایجان‌ین باشا باشیندا خیابانلارا چیخاراق تاریخده تایی گؤرولمه‌میش بؤیوک میقیاسدا اعتیراض یورویوشلری ایله اؤز میللی کیملیک و منلیگینه صاحیب چیخدیغینی بوتون دونیایا گؤسترمیش و آزربایجان‌ین میللی موباریزه تاریخینه قیزیل بیر صحیفه یازمیشدیر.

۱۲مای ۲۰۰۶دا ایران دؤولتی‌نین رسمی قزئتی اولان «ایران» قزئتی بیر دفعه داها فارس فاشیزمینین چیرکین اوزونو گؤستره‌رک آزربایجان تورکلرینه آغیر حقارتلر ائتمیش، آزربایجان تورکلرینی بؤجه‌یه بنزتمیشدی. بو اولای یوز ایللیک سؤمورگه‌چیلییه معروض قالماسیندان دولایی صبیر بارداغی دولان میلتیمیز اوچون سون داملا اولموش و هئچ کیمسه‌نین تخمین ائتمه‌دیگی اؤلچوده حادیثه‌لره سبب اولموشدور. ایلک اؤنجه اونیوئرسیتئتلرده باشلایان اعتیراضلار شهرلره یاییلمیش، ۲۲ مای‌دا تبریزده بؤیوک یورویوشلر باش وئرمیشدیر. ایکی هفته بویونجا ایسه اللی‌دن آرتیق شهر و قصبه‌ده کوتلوی اعتیراض نوماییشلری حیاتا کئچیریلمیشدی.

نه یازیق کی هر زامان اولدوغو کیمی فارس فاشیزمی و گئریچی-عیرقچی ایران رئژیمی میلتیمیزین حاقلی اعتیراضلارینا شیددتله قارشیلیق وئرمیش، اونلارجا وطنداشیمیز شهید دوشموش، یوزلرجه وطنداشیمیز یارالانمیش و مینلرجه‌سی توتوقلانمیشدیلار. یالنیز شوبهه یوخدور کی مای ۲۰۰۶ اولایلاریندا جانلارینی وطن اوچون فدا ائدن وطن اؤولادلاریمیز سونسوزا قدر میلتیمیزین گؤنلونده یاشایاجاقلار و تاریخیمیز اونلاری میللی قهرمان کیمی آناجاقدیر.

۲۲ مای ۲۰۰۶ آزربایجان تاریخینده و گونئی آزربایجانین قورتولوش موباریزه‌سینده فاشیزمه و سؤمورگه‌چیلییه قارشی موباریزه‌ده بیر دؤنوم نؤقته‌سی و سیموول اولموش و تاریخه کئچمیشدیر.

بیز بو بیلدیریشی ایمضالایان تشکیلاتلار، بو عظیم تاریخی حادیثه‌ده جانلارینی فدا ائدن وطنداشلاریمیزا تانریدان رحمت دیله‌ییب بو وسیله ایله بیر داها میلتیمیزله عهدیمیزی یئنیلیه‌رک بیلدیریریک کی، گونئی آزربایجان‌ین فاشیزم، عیرقچیلیق، سؤمورگه‌چیلیک و گئریچیلیکدن تام خیلاص اولماسینا و میلتیمیزین اؤز طالعیینه حاکیم اولماسینا دک موباریزه‌میز داوام ائده‌جکدیر. بیز بیر داها وورغولاییریق کی آزربایجان میللی حرکتی‌نین سون غایه‌سی میلتیمیزین مسعود، ریفاهلی، گوجلو و اؤزگور یاشاماسی و اؤز موقددراتینا حاکیم اولماسیدیر. بو هدفه چاتینجایا قدر ده موباریزه‌میز وار گوجویله داوام ائده‌جکدیر.

یاشاسین آزربایجان
یاشاسین اوزگورلوک
۲۱/۰۶/۲۰۱۸

آزربایجان دئموگرات بیرلیگی
آزربایجان اویرنجی حرکاتی (آذوح)
آزربایجان میلی دیرنیش تشکیلاتی (آم.د.ت) – دیرنیش
گونئی آزربایجان دئموکرات پارتیسی – گادپ
گونئی آزربایجان قورتولوش پارتیاسی – قورتولوش

هیچ دیدگاهی برای این مطلب ثبت نشده است

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

این سایت از اکیسمت برای کاهش هرزنامه استفاده می کند. بیاموزید که چگونه اطلاعات دیدگاه های شما پردازش می‌شوند.

روی خط خبر