آراز نیوز

ارگان خبری تشکیلات مقاومت ملی آزربایجان

دیرنیش
پنج شنبه ۹ام فروردین ۱۴۰۳
شما اینجا هستید: / بیانیه / بیرنئچه تانینمیش آزربایجان میللی فعالی‌نین اورمیه و سولدوز سئچکی‌لری حاققیندا بیلدیری‌سی

بیرنئچه تانینمیش آزربایجان میللی فعالی‌نین اورمیه و سولدوز سئچکی‌لری حاققیندا بیلدیری‌سی

بیرنئچه تانینمیش آزربایجان میللی فعالی‌نین اورمیه و سولدوز سئچکی‌لری حاققیندا بیلدیری‌سی
14 می 2017 - 19:37
کد خبر: ۳۵۶۸۹
تحریریه آرازنیوز

اولو تانرینین آدی ایله

بؤیوک آذربایجان تورک میللتی اؤزللیکله باشی اوجا اورمو و سولدوز اهالیسی هابئله میللی منافعی اوستون توتان آذزبایجانین میللی چالیشقانلاری!

بیلدیگینیز کیمی نئچه گون اؤنجه بیر مراجعت اساسیندا بوتون شخصلر و قروپلارین بیر آرایا گلیب، شهر شوراسی سئچگیلری ایله ایلگیلی واحد بیر لیست وئرمه لرینی دیله دیک! بو دوغرولتودا بوتون آذربایجاندا میللی حاقلاریمیزی مدافعه ائتمک اوغروندا چالیشان هر بیر چالیشقان کیمی، الیمیزدن گلَنی اسیرگه مه دیک. نئجه کی امکان چرچیوه سینده بوتون وسیله لردن یارارلاناراق بو ایکی شهرده( اورمو- سولدوز)بیرلیک یارانسین دئیه، مختلیف سلیقه لرله ایلگی قورماغا چالیشدیق. حتی بوندان آرتیق,مجبوریت اوزوندن اوستاد حسن بی دمیرچی جنابلاری، سایقی دیه ر یولداشلاری ایله بیرلیکده اورمو شهرینه سفر ائدیب، یاخیندان بوتون گوجلرینی ووردولار، بلکه دقت سیزلیک و مسئولیت سیز لیک اوزوندن و هابئله بیر پارا قیراقدان تزریق اولونان تَشتتلر، آرادان قالدیریلسین.
آنجاق تاسفله، سؤیله مه سیندن چکیندیگیمیز بیر چوخ نَدنلره گؤره, بوتون آذربایجانین آرزی ائتدیگی سونوج الده ائدیله بیلمه دی.

دیه رلی میللت و میللتچیلر!

بیلدیگینیز کیمی ایلک بیانییه ده, فعاللاریمیزین واحد بیر لیست اوزره توافق ائتمه دیکلری حالدا, مجبور اولاراق لیستلرین ان مشترک و قاپساملی سیندان حیمایت ائتمه ییمیزی سؤیله میشدیک.
امّا اوستاد حسن بی دمیرچی و سایین یولداشلارینین اورمودان عینی اولاراق گؤردوکلری, بیزیم او تصمیم دن واز کئچمه ییمیزه نَدن اولدو.
بوتون بو آخساقلیق و چاتیشمامازلیقلارلا بئله، هله ده اومودسوز دئییلیک و باشقا بیر چیخیش یولو و اؤنری ایله اورمو و سولدوزداکی اوره ک یاندیران و شرفلی میللتچیلره بئله اوز توتوروق:
بیلین‌کی، بوتون آذربایجانین گؤزو سیزلرین داورانیشیندادیر, هله ده بیرلشمک اوچون گئج دئییل! وطن و توپراق آدینا آددیم قویون ایره لی و بیرلیک ائدین!!!
البته اگر هله ده بو دوروم و گئدیشین اورمو و سولدوز شهرلرینه گتیره بیله جک اوغورسوزلوغو, هابئله یاغی و مهاجرلری باتی آذربایجانین باشقا شهرلرینده بئله نه قدر جَری ائده بیله جگینه فیکیرلَشمیر و یا هر نَدنه گؤره اؤنمسه میرسینیزسه و جان یاندیریجی فلاکتلری گؤره بیلمیرسینیزسه!!! تکجه بیر یول قالیر اودا بودور کی;
بو دورومو در ک ائدیب و توپراغیمیزی دوشونن و میللی ویجدانی اویاق اولان لیست وئرن هر بیرفرد و یا قوروپ، بؤیوک و تاریخی بیر جسارته ال ووروب و رای لرین داها آرتیق داغیلماسی نین قاباغینی آلماق ایچین, باشقا بیر لیستین نفعینه، اؤنردیکلری لیستدن واز کئچه رک بؤیوک فداکارلیقلا تاریخی بیر قهرمانلیغا دامغا وورسونلار.
سون وورغولاما بوکی:
بیز ، وئریلن هئچ بیر لیست‌دن حمایه ائتمه میشیک و ائتمیریک و یالنیز بیرلیگی ساوینیریق و آذربایجانین سعادتین بوندا گؤروروک.

حسن دمیرچی
اکبر آزاد
حسن راشدی
عباس لیسانی

هیچ دیدگاهی برای این مطلب ثبت نشده است

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

این سایت از اکیسمت برای کاهش هرزنامه استفاده می کند. بیاموزید که چگونه اطلاعات دیدگاه های شما پردازش می‌شوند.

روی خط خبر